2012年5月31日 星期四

錯上加錯 (31/05/2012)


蓮花地,近牌越嚟越離奇。有人僭填想霸地,畀官府「抽起」,本來幅地係「賊贓」。點知又被「老爺」「睇起」,重想搞過「乜乜加油站」咁離奇。

經常打雀咁眼嘅「雀士」,紛紛企出嚟,齊聲反對嗰「加油站」,起係鷺鳥林隔離,因為成日加油,唔單止擾雀清夢,分分鐘,重可能將啲珍禽嚇死!

更離奇嘅,係經常粒聲唔出,成日被人鬧唔做嘢嘅老爺,咁啱係呢個微妙時刻開腔,話要請啲專家學士,做番個乜乜評估,睇吓係咪起加油站,會將啲珍禽嚇死?

以上羅列出咁多東東,真個撲朔迷離,疑點重重。阿茂食飽飯,等廁所,又學人做福爾斯摩。未等乜乜評估出嚟,先學人試吓研究,係鳥林隔離起加油站,有何後果,是否對錯?

理據第一,嗰幅填湖地,係非法僭填,已經犯法在先 ,填嗰陣時,咁多老爺都咁啱「睇唔到」,已經係「離奇」失職,就算事後,「米已成炊」,先至發現,非法所得,已算「賊贓」,老爺之責,理應還原,自然之狀。老爺非但唔還原,失職之二,反用「賊贓」,錯上加錯,更有鼓勵再犯法之嫌,真係錯到「貼地」。

再者,係珍禽鳥林旁邊起「加油站」,成日「加油」,人聲鼎沸,仲唔嘈親啲敏感珍禽?你估啲鷺鳥好似啲老爺咁,裝聾扮啞咩?真係連細路仔都識分係真定假,啱定錯。咁顯淺嘅問題,還要「專家」嚟研究評估?阿茂真喺提議,提出「評估」嘅老爺,先要搵醫生,評估一吓佢嘅智商,同精神有否問題先嘞!

‧阿茂‧

沒有留言:

張貼留言