過咗七月十四，醜聞又揭批墓地，查案廉記，報告又是「好心地」。點出問題，又唔想將人鬧死。坊間估道，按照慣例，如此事件，又是眼開眼閉，虎頭蛇尾。側側膊，又過骨，豈料，大法師太，語出驚人，再揭波瀾，唔把人嚇壞，亦將人笑死。簡而言之，有人意為，一句「唔知」，勝過最好「避彈衣」？
此話怎解？皆因「墓地門」醜劇，廉記已經話，有「度身訂造」批地之嫌，呢句話，已經講得好「客氣」，充分顯示，廉記喺抱著治病救人之仁心仁術嚟做嘢。
豈料是，呢單嘢嘅上頭，應該實下屬嘅大法師太，突然語出驚人，一句「唔知」，就想「洗手」。各路高人，即刻噏嘢，紛紛稱奇！
口痕友話，下屬亂做嘢，互相打「龍通」，公地批私用，作為上頭，點可以話，下邊冇呈報，唔知就唔管，更無須負責？何謂若「監察」？
既然當上頭，職責察下屬，賊仔去偷嘢，亦唔報「阿蛇」，唔通差大哥，就唔去巡更？見賊偷咗嘢，亦唔去捉賊？上頭之職責，難道只享受「奶茶波蘿油，嘆飽攬枕頭？」
再者，當年可以賴，懵然全不知，睜眼看不見，如今證據在，報告亦公開，難道仍可賴，不知者不罪？
另外一方面，下屬犯咗罪，上頭只「洗手」，無須深追究？花旗大總統，揭出「水門案」，最初也抵賴，下屬擅自為，最後眾責下，終引咎下台，這一例明證，上級須負責，下屬嘅行為，既職責所在，亦公職問責！如今蓮花地，醜聞揭四起，將如何處理，考老爺面皮。
‧阿茂‧
沒有留言:
張貼留言